BACOLOD CITY — Malipayon nga gintakos kag gin-testingan sang mga benepisyaryo sang libre nga full dentures sa Bombo Medico 2017 ang ila nga mga postiso.
Sa ginpatigayon nga try-in sa Bacolod Multi-Specialty Dental Center Biyernes sang aga, excited kag nagayuhom nga gintakos sa 21 ka mga benepisyaryo nga nag-abot ang ila mga postiso, sa bulig sang Mendez Dental Group, sa pagpanguna ni Dr. Paul Bryan Mendez.
Matapos gintakos, ginpakita sa mga benepisyaryo ang ila hitsura antes kag pagkatapos mapasuksukan sang ila nga positiso.
Apang suno kay Dr. Jofel Pangantihon, sa pihak nga halos tanan husto ang takos sa postiso, may yara man sang liliwaton pa bangud sang pila ka deperensiya sini.
Suno kay Dr. Pangantihon, ang ginpatigayon nga fit in ang kabahin sang proseso agud masiguro nga husto gid ang takos kag mangin komportable ang magasuksok sini.
Ang wax nga gintakos sa mga benepisyaryo ang pagalutuon agud mangin postiso nga igahatag kadungan sangpagahiwaton nga Bombo Medico 2017 sa Hulyo 9.
Daw sa indi naman makahulat ang isa ka benepisyaryo sang libre nga full dentures nga taga-ciudad sang Talisay.
Ginpahayag ni Lilibeth Matta, 60-anyos, excited na siya nga suksukon ang bag-o nga postiso matapos nga nabuka ang daan sini nga full dentures anom ka bulan na ang nakaligad.
Suno sa benepisyaryo, tuman kabudlay magkaon kag makahuluya magyuhom nga wala sang ngipon apang bangud sang Bombo Medico, matapos na ang ini nga kalbaryo sang iya kabuhi.
