Matawhay kag malinong ang pagsug-alaw sang paskwa santo sa assessment sang Bacolod City Mobile Force Company.
Sa interview sang Bombo Radyo Bacolod kay Police Lt. Col. Ronnie Brillo, commander sa Bacolod City Mobile Force Company, wala sang ano man nga incident nga nagluntad sa ciudad sa pagsug-alaw sang paskwa.
Suno diri, ang mga seaports naggutok kahapon sa pagdaguso sang mga pasahero apang sa karun matawhay na bangod nakabyahe na ang kalabanan.
Pahanumdom ni Brillo, indi magbyahe kun yara sa impluwensya sang makahulubog nga ilimnon kag maghalong sa paggamit sang palupok sa palaabuton nga New Year Celebration.
Apang, nagpahanudom man ini sa mga kapulisan sa pagpalupok sang ila armas.
Pahayag ni Brillo, preparado ang Bacolod City Police Office sa pagpasanyog sang police visibility para sa selebrasyon sang paskwa kag bag-ong tuig.
Nagpasalig man ini nga yara ang BCPO para magserbe sa pumuluyo sang Bacolod.
