BACOLOD CITY — Napadala na sang provincial government sang Negros Occidental ang natipon sini nga relief goods para sa mga pumuluyo nga apektado sang gyera sa ciudad sang Marawi.
Ginkumpirmar ni Provincial Administrator Lucille Gelvolea nga sang nagligad pa nga semana ginpadala ang relief goods nga ginalakipan sang pagkaon, mga panapton, kag iban pa nga kagamitan, nga gikan sa nagkalain-lain nga grupo kag pribado nga indibidwal.
Ginpadala naman ang relief goods nga natipon sang city government of Bacolod.
Ginkarga lamang ang ayuda sa salakyan padulong sa ciudad sang Dumaguete, probinsiya sang Negros Oriental antes ginsakay sa barko padulong sa Mindanao.
Apang sa pihak nga ginpadala na ang relief assistance, bukas sa gihapon sa pagbaton sang dugang nga bulig ang provincial government para sa mga internally-displaced persons sa Marawi.
Samtang, ginkumpirmar man ni Gelvolea nga ginpadala na ang isa ka milyon ka pesos nga financial assistance sang Negros Occidental sa Marawi, pinaagi sang bank account sang provincial government sang Lanao del Sur.
