Nagdangat na sa 1,354 ang mga indibidwal nga nag-evacuate bangod sa mga pagbaha sa Bago City, Negros Occidental.
Sa interview sang Bombo Radyo Bacolod kay Councilor Mayette Javellana, sa report sang Bago City Disaster Risk Reduction and Management Office, sa 24 ka Barangay sa ciudad nagdangat sa 11 ang apektado sang pagbaha.
Ini ang ginalakipan sang Barangay Lag-asan, Atipuluan, Napoles, Dulao, Sampinit, Pacol, Balingasag, Busay, Ma-ao, Sagasa kag Malingin.
Samtang ang mga gikan sa Purok Sampinit Poblacion ang temporaryo naman nga nagtinir sa Bago City Coliseum.
Sa pagtsekyar sang Bombo News Team, may ginhamtang nga mga dalagko nga tents nga sarang makacater sang lima ka miyembro sang pamilya.
Suno kay Javellana, may-ara sang mga natrap bangod sa baha sa Barangay Sagasa, apang gilayon man nga narescue sang Bago CDRRMO.
Ginapakamaayo man sini nga wala sang recorded nga napilasan.
Padayun man ang pagbulig sang City Social Welfare and Development Office (CSWDO) nga nagalibot sa nagkalainlain nga mga evacuation centers kag nagahatag sang foodpacks.
Padayun man ang pagsulod sang supply sang tubig sa evacuation centers.
Pasalamatan man nila sang dako ang sin-o man nga magpalab-ot sang bulig sa mga biktima.
