Nagdangat na sa masobra sa 5,000 ang apektado sa paglupok sang bulkan Kanlaon nga nagatinir sa walo ka evacuation centers sa Canlaon City, Negros Oriental.
Sa interview sang Bombo Radyo kay Edna Lhou Masicampo, Public Information Officer sang Canlaon City, 1,583 ka mga pamilya ukon 5,039 ka mga indibidwal ang nagatinir sa sulod sang walo ka evacuation centers.
Suno diri, ginalauman pa nga magdangat sa masobra sa 6,000 ang evacuees amo nga plano sa karun nga madugang sang duha ka evacuation sites.
Supesyente man ang food supply sa ciudad bangod nga may mga donasyon nga ginapadala apang ang quick response fund sang ciudad nga P11 million ang nabuhinan na sang Hunyo 3 sang una nga naglupok ang bulkan Kanlaon apang sa karun may bilin na lang nga P4.7 million sa ila budget kag ini ang amat-amat na nga naga-gamay bangod nga dako ang magasto sa adlaw-adlaw nga kinahanglan sang mga evacuess.
Samtang, iban sa mga evacuees ang nagbatyag sang Acute Respiratory Infection, paghilanat, diarrhea, pagsakait kag paglingin sang ulo, pagsakit sang unto, abdominal pain, trangkaso, sore throat, myalgia, anemia, gingivitis kag neuritis.
