Nagpanawagan sang bulig ang parish priest sang St Vincent Parish Church sa Barangay Mansalanao, sa banwa sang La Castellana bangod sa tuman ka damo nga evacuees.
Sa interview sang Bombo Radyo Bacolod kay Rev Fr. Boyet, isa lamang ka libo ang capacity sang St. Vincent High School nga ginapagamit nila bilang evacuation centers, apang nagdangat na sa masobra dos mil ang mga evacuees.
May 41 ka classrooms sa buluthuan kun sa diin 38 na ang gingamit sang mga evacuees kag laboratory na lamang ang nabilin.
Magutok naman sa sulod sang kwarto kag indi tanan ang may matulugan.
Bangod sa kadamuon sang evacuees, aminado si Fr Boyet nga indi tanan ang ila mahatagan.
Ini bangod indi bastante ang ila resources para sa pagkaon, tubig, tululugan kag basic essentials sa kadamuon sang mga pumuluyo.
Isa man sa ginahatagan gid sang atensyon ang mga kabataan, senior citizen, nagabusong kag mga iloy nga may lapsag.
Panawagan ni Fr. Boyet sa mga luyag maghatag sang bulig nga idul-ong lamang sa St Vincent Parish Church ukon mahimo man sa iban nga diocese bangod ang mga ini ang nagaplano naman nga magpalab-ot sang bulig.
Mahimo man sila mabuligan sa pagpadala sa GCash nga 09177716917.
Ginapakamaayo man nila nga may una na nga nabatun nga mga canned goods, noodles kag iban pa nga relief packs.
Paathag sang pari nga pagkaon, tubig, basic necessities kag matulugan gid ang labi nga kinahanglan sang mga evacuees.// Magluwas sa mga pagkaon, sila ang nagprovide man sang spiritual support.
Ginapakamaayo sang pari nga madamo ang nag-upod sa ginpatigayon nila nga misa kaina sang kaagahon.
