Madamo na sang nagkaon sa mga kiosko kag kalabanan sa mga ini ang benepisyaryo sang food vouchers nga ginpanghatag ni Bacolod City Mayor Alfredo “Albee” Benitez.
Ginpadulungan sang Bombo News Team ang Bacolod City Public Plaza kun sa diin ang mga pumuluyo nga nagkaon sa mga kiosko nga ginhatag sang alkalde.
Ini ang ginalakipan sang mga magbarkada, mag-abyan kag magpamilya.
Madumduman nga ang alkalde ang naghatag sang P2.5 million nga balor sang food vouchers kun sa diin sa kabilugan nagdangat ini sa 12,500 food vouchers kag ini ang ginhatag sa City Councilors, Bacolod Yuhum Foundation, Isugid kay Mayor Team, personnel sang City Mayor’s Office, Philippine National Police kag iban pa agud nga mapanagtag man sa mga benepisyaryo.
May yara sang duha ka options ang voucher, isa ang para sa bisan diin lang nga kiosk kaangay sang Plaza, Bacolod City Government Center kag the Upper east.
Kag ang isa ang eksklusibo nga para lang sa Bacolod City Public Plaza.
May yara sang security feature ang food voucher agud indi ma peke ukon ma duplicate.
Ini ang personal nga kwarta sang alkalde nga gindonar para nga makabawi ang mga food kiosks sa public plaza, Bacolod City Government Center kag The Upper East matapus man ang halos isa ka semana nga malain nga tiempo kadungan sang Masskara Festival 2024.
Sa pihak nga bahin, ang mga peryahan nga ginpahamtang para sa Masskara Festival 2024 ang wala man sang maayo nga benta bangud sa naglabay nga bagyo.
Naghimo man ang mga ini sang paagi agud nga makabenta dugang kun sa diin nagapabayad lamang sini sang P100 sa entrance kag free ride na samtang ang mga bata nga nagaedad sang pito katuig panubo ang wala na sang bayad.
