May witness na nga nagtumod nga ang apat ka mga suspetsado sa pagpanghold-up sa tatlo ka construction worker sa Barangay Sum-ag sang Marso 14, amo man ang naghold-up sa mag-asawa sa Barangay Cabug sang Marso 12.
Madumduman nga kaagahon sang Marso 14 sang hinali nga nagsulod ang Toyota Innova nga itom sa ginaconstruct nga gasoline station, kag didto na gintayaan sang armas luthang ang mga biktima kag nataban ang duha ka cellphone kag isa ka wallet.
Ginpalukpan pa sang mga ini ang isa sa mga construction worker sang ginhaboy sini sang martilyo ang salakyan, nga mapalarun nga wala naiguan.
Matapos mapat-inan ang plate number sang salakyan, ini ang natrace naman sa Barangay Bata samtang natumod naman ang identity sang apat.
Ini bangod nagsugid ang tag-iya sang salakyan, nga nagarent-a-car service, nga gin-arkelahan ang salakyan sang iya nga suki, samtang ang manghod naman sini ang naggamit sang salakyan upod sa tatlo ka iban pa.
Nagsanto man ang timeline sang insidente sang mga pagpanghold-up sa pag-arkila sang salakyan.
Sa interview sang Bombo Radyo Bacolod kay Police Captain Michael Tuburan, hepe sa Bacolod Police Station 9, positibo na sila nga ang mga suspetsado sa paghold-up sa construction workers amo man ang suspetsado nga naghold-up sa mag-asawa sa Barangay Cabug sang Marso 12.
Nahibaluan nga igadul-ong kuntani sang bana ang iya asawa nga call center agent sa trabaho sang sila ang gindulugan sang maroon nga Toyota Innova kag ginhold up.
Ginalantaw ni Tuburan nga bangod lamang sa nasilakan sang suga gani kaangay nga nangin maroon ang duag sang itom nga Innova.
Sa karun ginahikutar na ang mga papelis sa pagpasaka sang kaso sa prosecutor, nga amo ang magaforward sa korte.
Magapatawag naman sang summon ang korte, kag hinali nga indi makapakita ang mga akusado, sila ang dagdagan na sang Warrant of Arrest.
