Ginalantaw sang Bacolod Police Station 3 nga mga kabataan nga nagapangscrap ang nagsulod sa duha ka nakasarado na nga establishimento sa Lacson Street, Brgy Mandalagan, Bacolod City.
Madumduman nga ginreport sang tag-iya sang isa ka karenderia nga ginsulod sang kawatan ang isa ka botique kag lapida maker shop.
Ang mga kawatan ang naghimo sang buhi sa steel nga dingding nga sarang lamang makaigo ang isa ka magamay nga tawo ukon bata.
Sa interview sang Bombo Radyo Bacolod kay Police Captain Andro Maapni, officer in charge sang Bacolod Police Station 3, ginbalikan nila ang area kag nakita nila nga wala man sang valuable items sa sulod.
Ginalantaw sini nga mahimo nakuha naman sang mga negosyante ang mga malahalon nga pagkabutang sang magsarado.
Ini bangod may nakapaskil sa gwa sang mga establishimento nga “for temporary closure” bangod sa ginapahayag problema sa building permit sang tag-iya.
Ang duha ka negosyo ang lunsay nagarenta lamang sa building.
Suno kay Maapni, sa sulod, nakita nila nga ang malaba nga steel nga bangko ang kaangay nga napalapit na sa buho nga ginhimo sang mga kawatan.
Gani ginalantaw nila nga ini kuntani ang kawaton agud ipa-scrap apang wala madayun.
Suno kay Maapni, ginapanugyan man nila sa mga tag-iya sang negosyo nga makig-angot sa kapulisan para sa pagfile sang formal complaint.
Luyag man nila mahibaluan kun may ara sang valuable items nga nabilin sa building antes ginsirado, bangod may impormasyon man nga makapila na ginsulod sang kawatan ang mga establishimento.
Sa pihak nga bahin, may kawatan naman nga nadakpan sa Brgy Alijis kahapon, nga gina-alegar amo man ang masami nga nagalibot libot sa area of responsibility sang Bacolod Police Station 3.
Hibaluon pa ni Maapni kun ini man ang responsable sa pagpangawat sa duha ka establishimento.
