Ginpahayag sang spokesperson sang Negros Occidental Police Provincial Office (NOCPPO) nga mas temprano pa sila nagdeklarar sang heightened alert status bangud sa pag-alburuto sang Bulkan Kanlaon kun sa diin nagdeklarar sang Alert Level 3.
Sa interview sang Bombo Radyo Bacolod kay Police Captain Judesses Catalogo, nagpadala ang NOCPPO sang mga police personnel nga mag-augment agud magsiguro sang seguridad sang mga evacuees kasubong man ang mga nagadul-ong sang relief goods.
Suno kay Catalogo, sa bilog nga bulan sang Disyembre nakaheightened alert naman ang tanan nga mga kapulisan.
Ini agud nga siguruhon ang seguridad sang mga pumuluyo nga magaselebrar sang Christmas kasubong man sa Yuletide season.
Gindeploy ang mga kapulisan sa mga highly congested nga mga lugar kaangay sang plaza, mga super kag public markets kasubong man sa mga terminals.
Ini agud nga indi makapamintaha ang pila ka mga indibidwal nga nagahulat lamang sang oportunidad agud nga makahimo sang ila malain nga mga tinutuyo.
