Nagpatigayon sang simple kag malip-ot nga programa ang mga manunudlo sa syudad sang Bacolod para sa selebrasyon sang World Teachers Day subong nga adlaw Oktubre 5.
Sa interview sang Bombo Radyo Bacolod kay Richard Gelangre, presidente sang Bacolod City Public School Teachers Federation, gin-umpisahan sang mga manunudlo ang ila nga programa paagi sa santos nga misa; pagkatapos sang misa, kag ginpatigayon ang tributes para sa mga manunudlo.
Gin-invite man sang mga manunudlo ang kongresista sa syudad sang Bacolod nga magtambong sa ginpatigayon nga programa.
Nagpatigayon man sila sang pahampang para sa mga manunudlo.
Kadungan sang selebrasyon sa teachers day, pila sa mga panawagan sang mga manunudlo nga pasakaan ang sweldo sang mga manunudlo, pagamayan ang classroom size; dugang nga budget para sa paghire sang dugang nga mga manunudlo agud nga mabuhin ang workloads sang teachers kag mahatag ang kalidad sang edukasyon ilabi na nga magafull blast na ang face to face classes sa bulan sang Nobyembre.
Nag-abot naman ang P,1000 nga cash allowance sang mga manunudlo nga ginahatag sa tagsa magteachers day.
Samtang ang P2000 nga ECOLA ang nabaton naman sang mga ini apang wala pa sila nakahibalo kun pila ang idugang ni Bacolod City Mayor Alfredo Benitez.
Nagpanugyan man si Gelangre sa mga estudyante nga padayunon ang pagrespeto kag pagsunod sa mga manunudlo nga nagagiya sa ila para sa maayo nga bwas damlag.Kasubong man sa mga manunudlo nga ipadayunon lamang ang paghatag sang serbisyo santo sa ila nga ginsumpaan.
