Nagapasalamat ang Secretary sang Bacolod City Public School Teacher’s Federation sa pag-aprubar sang Department of Budget and Management sa budget para sa paghire sang singko mil nga mga non-teaching personnel, apang ang mga ini ang may-ara sang kahangawa
Sa interview sang Bombo Radyo Bacolod kay Grace Abellar, ang tikang ang ginhimo agud mabuhinan ang work loads sang mga teaching personnel.
Apang ginakahangawa sini ang posibilidad nga indi mahatagan sang nagakaigo nga sweldo ang mga administrative personnel.
Sa guidelines, nahibaluan nga plano sang Department of Education (DepEd) nga iclustering ang mga magkatupad nga mga eskwelahan kag ang mga administrative works ang trabahuon sang isa lamang ka administrative personnel.
Ginakahangawa man sini nga indi masarangan sang isa lamang ka tawo ang administrative works gikan sa tatlo pasaka nga mga eskwelahan ilabi na nga iban sa mga reports ang may rush nga deadline.
Paahyag pa sini nga sa kadamuon sang eskwelahan sa Pilipinas, tuman ka nubo ang 5,000 nga ihire sang gobyerno.
Pangabay sini nga kun maghimo sang tikang, indi pahat-pahat, kaangay sa paghire sang madamo nga manunudlo apang kulang naman ang pasweldo.
Sa pihak sini, ginapasalamatan ni Abellar nga may tikang ang gobyerno, kag ginalantaw man sini nga gina-amat amat lamang ang paghire kag ini ang dugangan pa.
