Gin-athag sang chief executive officer sang Metro Bacolod Chamber of Commerce and Industry nga wala man nagapamalabag ang mga vendors sa renovation sang merkado kundi kinahanglan lang man nila nga pamatian.
Sa interview sang Bombo Radyo Bacolod kay Frank Carbon, kinahanglan lamang sang mga vendors nga pamatian man ang ila nga mga concerns kag nagapati ini nga masolbar ini kun estoryahan lamang kaupod ang ciudad.
Suno kay Carbon, naintsindihan sini ang punto sang mga magagmay nga negosyante nga nagabaligya sa merkado ilabi na ang Burgos Public Market.
Ginpahayag sini nga ang mga magagmay nga mga negosyante ang dapat nga ulikdon kag tatapon sang ciudad bangud ang mga ini ang nagabulig man sa pag-uswag sang ekonomiya sang Bacolod City.
Gindayaw man sini ang alkalde bangud gin-amat amat sini nga mahatagan sang solusyon ang problema sang kuryente kag tubig bangud ini ang nakita niya kinahanglanon sang mga negosyante sa ciudad.
Ginpahayag ni Carbon nga maayo magplano ang alkalde bangud isa man ini ka negosyante.
