Sa sulod sang isa tubtob duha ka bulan, ginalauman nga makasulod na sa bag-o nga Sum-Ag Public Market ang mga market vendors.
Madumduman nga ginpanawagan na nga mapadasig ang pagsaylo sa building bangod nagatuga na sang huol sa trapiko ang pagtinir sang mga market vendors sa kilid sang dalan partikular na kun peak market days.
Sa interview sang Bombo Radyo Bacolod kay Punong Barangay Rodney Carmona, ginaproseso na sini ang mga dokumento agud makakuha sang occupancy permit gikan sa Bacolod City Engineer’s Office.
Kasunod sini, ila naman nga asikasuhon ang pagseguro sang power supply sa building.
Sa tion nga ini ang mahitso na, sarang naman nga makasaylo ang mga vendors.
Suno kay Carmona, ginplastar naman sang mga ini ang sectioning sa Sum-Ag Public Market kun sa diin igahamtang ang dry goods, vegetable, fish kag meat section.
Natul-id naman sang mga ini ang pwesto sang mga vendors.
Panindugan man sini nga indi ang arrears sa kuryente ang rason kun ngaa wala pa magamit ang building, bangod ini ang madugay na nga nasettle.
Nagapangayo na lamang ini sang gamay nga pasensya gikan sa mga motorista, vendors kag customers nga nakaangkon sang kabudlayan.
Nahibaluan nga kun tiyenda, nagakapuno ang sidewalk sa atubang sang building gani ang mga bumalakal kag iban pa ang yara na sa highway nagalakat nga yara sa risgo nga mabungguan.
Apang pahanumdom ni Carmona nga indi ang market vendors ang rasun sa congestion sang salakyan sa lugar, kundi bangod sa ginaconstruct nga taytay.
Sa karun, sila ang nagadeploy man sang Barangay Tanod agud magbulig sa pagderiher sang trapiko sa nasambitan nga area.
