Nakapauli na ang mga pumuluyo nga nagpadulong sa mga evacuation centers sa ciudad sang Cadiz, Negros Occidental matapos nga nabahaan sang Lunes.
Sa interview sang Bombo Radyo Bacolod kay Cadiz City Mayor Salvador Escalante Jr., nagdangat sa anum ka barangay kag 800 ka pamilya ang nagpadulong sa evacuation center bangud sa nagluntad nga pagbaha sang nakaligad nga Lunes sang kaagahon sa ciudad sang Cadiz.
Suno kay Escalante, may magluwas nagpadulong sa evacuation center may yara man sang 1,100 ka pamilya nga naapektuhan apang wala man nagpadulong sa evacuation centers.
Suno sa alkalde sa kabugusan 5,700 ka individuals ang naapektuhan sang nagluntad nga pagbaha.
Ginpahayag sang alkalde nga P350,000 nga balor sang pananum ang naapektuhan samtang ang sa livestocks ang padayon pa ang assessment.
Suno kay Escalante, sa 30 ka tuig sini nga yara sa serbisyo publiko amo pa lang natabo ang pagbubo sang 7 liters sang tubig-ulan kada oras.
Mensahe sang alkalde subong nga paskwa nga apisar sang nagakatabo nga trahedya pasalamatan sa gihapon ang Ginoo nga buhi kag nagapadayon nga mabakod apisar sang pagpanghangkat sa kabuhi.
Nakahibalo ini nga masakit ang natabo ilabi na sa nagsalalaka sa babaw sang atup sang ginbahaan.
Ginpasalamatan man sini ang tanan nga mga private individuals ka mga opisyales sang ciudad nga wala man nagpabaya sa mga pumuluyo sa ciudad sang Cadiz.
Ang mga evacuees ang ginhatagan man sang city government sang food packs agud nga madala pauli sa ila tagsa ka puluy-an.
