Madutay gid lamang ang nag-eskwela kahapon kasunod sa pagtakop sang holiday break.
Sa interview sang Bombo Radyo Bacolod kay Richard Gelangre, presidente sang Bacolod City Public School Teachers Federation kag principal sang Bacolod City National High School, sa kapin 7,000 ka estudyante, wala kalab-ot sa 200 ang nag-eskwela kahapon.
Suno diri, iban sa mga classrooms may tagpila lang ka estudyante kag ang mga manunudlo ang nagpatigayon na lang sang film showing nga relevant man sa klase samtang may yara man sang nagpatigayon gid sang klase.
Pahayag ni Gelangre, wala pa ini naka-eksperyensya nga ginbalik gilayon ang klase sa Enero 2 matapos ang holiday break.
Apang, ginpa-athag ni Gelangre nga gilayon nga ginbalik ang klase bangod ginalagas sang Department of Education (DepEd) nga mapabalik sa Hunyo ang opening of class.
Samtang, sa bahin sang mga manunudlo naman, may yara man sang absent apang pilahon lang.
Ginalauman sang principal nga magdamo na ang estudyante kag maka-umpisa sang pormal nga klase.
