Mga nakuha gikan sa mga witnesses sa kaso sang Bornales siblings sa Silay City, lunsay “circumstancial evidence” lamang

Ginakabig sang kapulisan nga “circumstancial evidence” lamang ang ila nakuha sa pahayag sang lima ka boluntaryo nga witness angot sa kaso sang Bornales siblings.

Madumduman nga duha na ka semana ang nakaligad matapos ang natabo nga pagpanglampos sang bato sa tatlo ka mga mag-ululutod sa sulod sang ila puluy-an sa Hacienda Badiang, Barangay E. Lopez, Silay City sang Pebrero 7 nga nagresulta sang pagkamatay sang siyam ka tuig nga bata, pagkasamad sang apat ka tuig nga bata nga lalaki kag 14-anyos nga magulang sini.

Sa interview sang Bombo Radyo kay Police Captain Judesess Catalogo, Spokesperson sang Special Investigation Task Group – Bornales, wala pa gid sang konreto nga ebidensya nga mahimo makatudlo sa supetsado.

Suno diri, may ara na sang lima ka witness nga naghatag sang impormasyon kag base sa ila nga document evaluation, ara sila sa gihapon sa “build best submit investigation” kun sa diin gina-comply nila ang mga requirements sa pagpasaka sang kaso.

Nagapati naman si Catalogo nga may ara gid sang witness nga nakakita sa natabo nga krimen kag makahatag sang impormasyon sa pagsulbar sang kaso.

Pasalig sini nga ang City Prosecutors sang Silay City ang bukas sa mga witness nga maka-avail sa ila “witness protection program” nga mahimo ihatag sa ila.