Nagapanawagan ang African Swine Fever (ASF) Task Force sang Negros Occidental sa mga nagasagod sang baboy nga mangin vigilante kasunod sang kahangawa sa ASF virus nga naga-apekto na sa pila ka pungsod lakip na sa Asya.
Suno kay Dr. Anika Villegas, Farm Veterinarian nga na-assign sa Negros First Ranch sa Murcia kag miembro man sang ASF Task Force, dapat mangin vigilante ang mga hog raisers kag gilayon nga mag-report sa natungdan nga ahensiya sang gobyerno sa tion nga may nakita na nga indi amo sa ila ginasagod nga mga baboy.
Apisar wala pa nakasulod sa Pilipinas ang ASF, ginapahibalo ni Dr. Villegas ang mga sintomas nga mabatyagan sang mga baboy nga apektado sang nasambit nga virus.
Ang isa ka baboy nga apektado sang ASF ang ginahilanat kag gina-ubo, wala sang gana magkaon sang apat tubtub lima ka adlaw kag nagalain ang kolor sang ila extremities kaangay sang punta sang tiil kag dulunggan.
Suno kay Dr. Villegas, ang Negros Occidental ang nagapanguna sa pungsod Pilipinas sa may pinakadamo nga backyard hog raisers ukon nagasagod sang baboy sa panimalay nga nagadangat sa kapin sa 510,000.
Madumduman nga isa ka executive order ang ginpaguwa ni Governor Eugenio Jose Lacson nga nagmando sa pagtukod sang task force agud mapabakod ang seguridad sa mga pwerto kag airport agud matapna ang pagsulod sa probinsiya sang mga pork meat products nga apektado sang ASF.
