Gina-trace na sang World Health Organization (WHO) ang mga pasahero nga sakay sang isa ka flight, naggikan sa isla sang Saint Helena padulong sa Johannesburg, nga ginsakyan sang isa ka cruise ship passenger nga ginbawian sang kabuhi bangud sa hantavirus.
Suno sa South African airline nga Airlink nga nakabase sa South Africa, may kabug-usan nga 82 ka pasahero kag anum ka crew ang sakay sang nasambit nga flight sang Abril 25.
Kalakip sa mga pasahero ang Dutch national nga babayi nga ang bana ang napatay man sa pareho nga rason.
Suno sa WHO, naglala ang kondisyon sang babae samtang yara ini sa biyahe padulong sa Johannesburg.
Nauna nga nagpanaug ang babayi gikan sa barko sa Saint Helena sang Abril 24 matapos makaeksperyensya sang sintomas sa gastrointestinal.
Pag-abot sa isa ka ospital sa Johannesburg, nagtaliwan ini kag nagpositibo sa hantavirus.
Gin-abisohan na sang mga otoridad sa South Africa ang airline nga paandaman ang mga pasahero agud gilayon magpakig-angot sa ila health department.
Ginasuspetsahan sang WHO nga posible maglapta ang hantavirus sa mga pasahero sa cruise ship nga sa karon yara sa Cape Verde.
Magluwas sa mag-asawa nga Dutch, isa man ka German national ang nareport nga napatay.
Sa subong, may-ara na sang pito nga kumpirmado nga kaso sang hantavirus nga konektado sa insidente.
