Ginreport nga may tatlo ka ginbawian sang kabuhi kag isa ka UK national ang yara sa indi maayo nga kahimtangan kag nagalala na ang kondisyon matapos ang ginasuspetsahan hantavirus outbreak sa isa ka cruise ship sa Atlantic Ocean.
Ginkumpirmar sang operator sang MV Hondius ship, Oceanwide Expeditions, nga napatay ang dutch national nga mag-asawa kasubong man sang isa ka German national, apang wala pa natumod ang hinungdan sang kamatayon.
Apang ginkumpirmar sang Dutch company nga may confirmed case na sang hantavirus sa isa ka 69-year-old nga UK national nga yara sa idalom sang intensive care sa Johannesburg, South Africa.
Ang hantavirus ang masami gakapasa sa tawo gikan sa mga ilaga paagi sa ila higko, laway, ukon ihi.
Ang amo nga virus ang makatuga sang malala nga respiratory illness.
Ang MV Hondius vessel ang sa karon yara sa coast sang Cape Verde sakay ang 149 ka mga indibidwal.
Ginpahayag man sang Oceanwide expeditions nga may yara sila sang duha ka crew member nga may “acute respiratory symptoms”.
Ginlaragway sang Oceanwide Expeditions nga isa ka “serious medical situation” ang natabo sa sulod sang cruise ship kag nagapakig-angot na sa mga lokal nga otoridad.
