BACOLOD CITY-Nagakahangawa karun ang mga Filipino sa Estados Unidos sa pag-atake sang mga suicide bombers kasunod sang pagkapatay sang top Iranian general sa US airstrike.
Sa interview sang Bombo Radyo Bacolod kay Christina Waterland, nga isa ka casino dealer kag tumandok sang Brgy. Mansilingan, ciudad sang Bacolod apang nakapamana sang Amerikano kag nagapuyo na karun sa South Dakota, USA, wala nagakabalaka ang mga pumuluyo sa US apisar sang tensyon sa Middle East kasunod sang pagkapatay ni Qassem Soleimani.
Suno kay Waterland nga pito na katuig nga nagapuyo sa US, dako ang ila pagsalig sa gobyerno sang Amerika nga sarang sila ma-proteksyunan kag luwas sila kun ara sa Amerika.
Suno diri, madamo sang military bases ang US sa palibot sang ila pungsod nga sarang makapugong sa anuman nga pag-atake sang Iran.
Suno pa diri, nagapabilin nga normal ang ila trabaho kag wala man sang abiso ang US government tuhoy sa mga nagakahanabo.
Apang nagakabalaka ang mga Pinoys sa US suno kay Waterland sa mga suicide bombers halin sa Iran nga magasulod sa Amerika.
Dugang pa sini nga nga nagakahangawa man ang mga Pilipino sa ila mga himata nga kabahin sang tropa sang Amerika nga ginpadala sa Middle East kasunod pagsingki sang tensyon sa pagkamatay ni Soleimani.
