Excited na ang mga Pinoy sa Estados Unidos nga ipakita ang ila nga suporta sa kandidata sang Pilipinas sa Miss Universe coronation night nga patigayunon sa Disyembre 9 sang aga, oras sa Pilipinas.
Sa interview sang Bombo Radyo Bacolod sa international fashion designer nga si Kirsten Regalado, ginkumpirmar sini nga fully-booked na ang Atlanta Marriott Marquis nga iya ginatiniran kag diri man naka-check in ang mga kandidata sa Miss Universe.
Suno kay Regalado, sa pareho man nga hotel patigayunon ang preliminaries sang prestihiyoso nga pageant halin bwas tubtub sa Domingo kaangay sang national costume.
Sa Domingo sang gab-i, isa ka dinner ang ginhanda para sa mga kandidata kun sa diin gin-imbitaran man si Regalado nga nagpailis sa limaka contenders.
Sa Disyembre 9 naman, magasaylo na ang mga ini sa Tyler Perry Studios kun sa diin pagapilion ang pagapasahan ni reigning Miss Universe Catriona Gray sang korona.
Bilang labing una nga Pinay nga nagdisenyo sang bayo sang lima ka Miss U candidates, may kahigayunan naman si Regalado nga magpa-picture kay Gray kag sa koronahan nga kandidata.
Sa karon suno sa Negrense designer, nag-inabot na sa Atlanta, Georgia ang mga Pinoy nga magasuporta sa pambato sang Pilipinas nga si Gazini Ganados kag nagbisita man ang mga ini sa hotel kagab-i kun sa diin sila ang sila ang tuman nga nagdayaw sang nakit-an si Ganados kag Gray.
Mabudlay naman suno sa iya ang pagbakal sang ticket pasulod sa Tyler Perry Studios bangud madamo ang luyag nga maglantaw sang coronation night.
Nagpasalamat naman si Miss Saint Lucia- Universe Bebiana Mangal kay Regalado sa matahom sini nga creation.
Si Mangal ang ginhimuan ni Regalado sang evening gown kag national costume.
Gindayaw man sini ang matahom nga desinyo sang Negrense fashion designer.
Isa man sa mga ginpabayuan ni Regalado amo si Miss Mauritius Universe Ornella LaFeche.
Sa interview ni Mike Regalado, anak ni Kirsten kay LaFeche, nagpasalamat ini sa iya nga mga supporters antes ang iya pagsabak sa pageant.
Gin-inspire man sini ang kaangay niya nga biktima sang sexual abuse nga mangin malipayon sa kabuhi bisan nahibaluan sini nga traumatic ang iya gin-agyan.//// VC: MISS MAURITIUS UNIVERSE ORNELLA LAFECHE
