Pahayag ni Negros Occidental Provincial Consultant on Energy and Environmental Concerns former Governor Rafael “Lito” Coscolluela nga sarang nga ma-tap ang private companies kaangay sang sugar centrals kag mga chemical laboratories sang mga unibersidad sa pagpadamo sang biocontrol agents nga magamit batok sa red-striped soft scale insect (RSSI).
Suno diri ang Sugar Regulatory Administration (SRA) ang nakasugod na sa reproduction sang fungi kag insekto nga maga-away sa RSSI nakaligad pa nga tuig, apang mahinay kag indi bastante sa kadakuon sang kahalitan.
Ginalantaw man ni Coscolluela nga mahimo ma-tap ang mga retired chemist para mapadamo ang reproduction laboratories.
Isa sa halimbawa sini ang First Farmers nga nakaproduce na sang biocontrol agents nga makacater sang 300 hectares sang katubuhan.
Nasaksihan niya mismo sa isa ka sugar plantation nga ginspray nila sang pesticide sang nagnilupad ang madamo nga mga ba-o ba-o ukon lady bugs.
Dugang pa sini nga sa iya nakita, indi itlog sang RSSI ang ginakaon sang ba-o ba-o kundi mismo ang mga peste nga RSSI.
Suno diri, madamo na sang natural nga ba-o ba-o nga naga-eksister sa katubuhan, gani kinahanglan na lamang makapangita sang paagi nga sila ang mapadamo.
Apang ginakasubo man niya nga ang mga ba-o ba-o nga yara na ngadaan sa mga sugar plantation ang malakip sa mapatay kun matup-an sang chemical pesticide.
Sa pag-usisa niya sa insectarium sang Provincial Task Force, sila ang may napreparar na nga kwarto sa Panaad Park para sa reproduction sang lady bugs, kag nagahulat na lamang nga madeliver ang equipments.
Nagalaom si Coscolluela nga ini ang masuguran na sa masunod nga bulan.
Sa pihak nga bahin, pag-abot sa applications sang mga chemical ukon organic methods ang pangunahan naman sang 435 ka mga paravets gikan sa nagkalainlain nga Barangay.
