BACOLOD CITY-Nag-apelar si Negros Occidental Governor Eugenio Jose “Bong” Lacson sa mga private hospital sa probinsiya kag sa ciudad sang Bacolod nga mangin handa sa anuman nga posibilidad nga may yara sang I-admit sa ila nga may sintomas sang 2019 novel coronavirus acute respiratory disease (NCOV-ARD).
Suno kay Lacson, dapat handa kag willing man ang mga private hospitals nga bulngon ang mga pasyente nga makabig persons under investigation (PUIs) sang nCoV.
Nahibaluan nga ang una nga nagkadto sa isa ka private hospital ang duha ka mga persona nga ginakonsiderar karon bilang PUIs sa Negros Occidental sa mga private hospitals apang gin-refer sila sa Corazon Locsin Montelibano Memorial Regional Hospital.
Nagpanugyan man ang gobernador sa publiko nga gilayon nga magreport sa otoridad kun may nahibaluan nga tawo nga nakakadto sa mga lugar nga may positibo nga kaso sang virus.
Nagpahanumdom man ini sa mga naka-close contact sa isa ka 48-anyos nga Canadian national nga lalaki kag 12-anyos nga Negrense nga lalaki nga ginakabig karon PUIs nga magself-quarantine lamang.
Liwat naman nga gin-athag ni Lacson nga wala sang kumpirmado nga kaso sang nCoV sa probinsiya.
