Aminado ang secretary-general sang United Negros Drivers and Operators Center (UNDOC) nga indi pa makapatuman sang fare increase ang pila sa mga traditional jeepney bangud wala pa sila nakakuha sang fare matrix.
Santo sa mandu sang Land Transportation Franchising and Regulatory Board, epektibo na subong nga adlaw ang P12 nga pamasahe sa traditional jeepney samtang P14 naman ang minimum regular fare sa modern jeepney.
Sa interview sang Bombo Radyo Bacolod kay Diego Malacad, may yara sila sang kabudlayan sa pagkuha ukon pagproseso sang mga dokyumento kaangay sang fare matrix bangud kinahanglan pa magtabok sa syudad sang Iloilo agud magkuha sini.
Suno kay Malacad, may yara sang bayad ang pagkuha sang fare matrix nga P720 sa tagsa ka unit sang public transport bangud may yara na ini sang seal kag malikawan ang paggamit sang mga bentahuso nga mga nagabiyahe kaangay sang wala sang prangkisa.
Ginpahayag man sini nga kun may yara lamang sang opisina sang Land Transportation Franchising and Regulatory Board (LTFRB) mahapos na sa mga operator nga magkuha sang mga permits kag iban nga kinahanglanon nga dokyumento.
Ginalantaw man sini nga daw kaangay nga ginpatumbayaan ang probinsya sang Negros Occidental bangud wala sang ginbutang nga sattelite office sang LTFRB.
Bangud sa kabudlayan sa pagproseso agud nga magkuha sang fare matrix, ginpahayag ni Malacad nga mas maayo nalang nga indi nalang pagipatuaman ang pamasahe.
