Kalmado ang mga pumuluyo kag wala nagabuga sang abo ang Bulkan Kanlaon sa bahin sang La Castellana santo sa assessment ni Negros Occidental 5th District Representative Atty. Dino Yulo matapos naglibot sa pila ka mga barangay kaupod ang mga opisyales sang banwa.
Sa interview sang Bombo Radyo kay Yulo, sa karun wala sila sang may masimhutan nga asupre sa La Castellana kag ini ang iya dako nga ginapasalamatan.
Suno diri, sa karun ila ginaatipan ang magamay nga numero sang mga nagdesisyon nga magbiya anay sa ila mga puluy-an.
Nagapadayon naman suno sa kongresista ang ila pagpangita sang permanente nga solusyon para sa mga nagapuyo sa 4 to 6 kilometers danger zone sang bulkan.
Aminado si Yulo nga wala sang pamaagi agud mapaktan ang mangin masunod nga aktibidad sang bulkan apang ang importante, preparado ang gobyerno kag mga tawo.
Nagapasalamat ini sa tanan nga opisyales sang barangay nga nakastandby bilog nga gab-i kag nagpanugyan sa mga pumuluyo nga mag-aligmat.
