Nangin generally peaceful ang ciudad sang Bacolod apisar nga may yara sang nagpatigayon sang mga rally kadungan sang ikaapat nga State of the Nation Address ukon SONA ni President Ferdinand “Bongbong” Marcos Jr. kahapon.
May yara sang katapo sang 79th Infantry Battalion sang Philippine Army ang nag-undercover ukon wala nagsuksok sang uniporme nga nagbantay sa sitwasyon.
Ang mga ini ang yara sa area agud nga magpanilag kag kun may yara sang kinahanglan nga respondehan magaresponde ang mga ini gilayon.
Sa interview sang Bombo Radyo Bacolod kay 1st Lt Dan Samoza, Civil Military Officer sang 79th IB nga ang pagdeploy sang mga ini sa tion sang may pagtipon-tipon kadungan sang SONA ang nakaandan na.
Suno kay Samoza, ginsiguro sang mga ini ang seguridad sang mga nagpatigayon sang protesta PRO ukon ANTI government man ini bangud indi sang mga ini maluyag nga may maggamit sang tion kag gamuhon ang sitwasyon.
Gani ang 79th IB sa pagpanguna ni Lt Col Eric Alfonso sang mga Army personnel bilang augmentation force sa Philippine National Police.
Panugyan sini sa publiko nga respetuhon ang mga ginapatihan sang tagsa tagsa ka mga Filipino samtang nagapagwa sang tagsa tagsa ka mga sentimyento.
Wala man sang narecord nga insidente ang Bacolod City Police Station 1 sa pihak sang mga nag-rally kasunod sang ginpatigayon nga ikaapat nga State of the Nation Address (SONA) ni Presidente Ferdinand “Bongbong” Marcos Jr.
Sa interview sang Bombo Radyo Bacolod kay Police Captain Francis Depasucat, station commander sang Bacolod Police Station 1 nga generally peaceful ang ciudad sang Bacolod sa pihak sang mga nag-rally kag nagpabutyag sang ila tagsa mga sentimyento sa gobyerno.
Suno kay Depasucat, ang mga nagrally ang ginabug-usan sang Gabriela, Kabataan Party-list kag iban pa.
Suno diri ang mga grupo ang may yara sang nagakaigo nga permit kag nagpatigayon sang rally sa designated areas.
