Nagapanagawan ang punong barangay sang Barangay Bi-ak na Bato, banwa sang La Castellana, Negros Occidental sa mga luyag mga magbulig sa mga residente sang Barangay nga naapektuhan sang paglupok sang Bulkan Kanlaon kag sang lahar flow.
Sa interview sang Bombo Radyo kay Punong Barangay Joselito Martinez Jr., madamo sang bulig nga nagaabot sa Barangay kag isa na diri ang mga grupo sang doctor nga naghatag sang purified nga ilimnon nga tubig.
Suno kay Martinez, indi tanan nga mga residente sang Barangay Biak na Bato nga apektado sang paglupok sang Bulkang Kanlaon sang Lunes kag lahar flow sang Miyerkules ang wala nagtinir sa evacuation center bangud ang iban ang nagtinir sa ila mga pamilya.
Ang barangay ang nagaluto man sang pagkaon para sa mga residente kag nagahatag man sang bulig magluwas sa bulig nga ginhatag sang banwa.
Santo sa data, 444 ka indibidwal ang nagatinir sa karun sa evacuation center sang Barangay.
Ginpahayag man sang Punong Barangay nga ginatipon nila ang mga nag-abot nga bulig para mga residente nga apektado sang paglupok sang Bulkang Kanlaon kag lahar flow.
Ini agud nga mapanagtag sa 1120 ka households sa barangay kag ini ipanagtag door to door agud masiguro nga tanan ang makabaton.
Ginpahayag ni Martinez nga nadudla na sila sadto nga ginpapila nila ang mga residente bangud doble ang nakuha sang iban samtang ang iban ang wala sang may nabaton.
