Ginhingyo sang mga sugar farmers sa Negros Occidental sang sila ang ginbisitahan ni Senator Imee Marcos nga matukuran sang dam ang pila ka mga suba sa probinsya, kag makatukod sang dugang nga irrigation canal.
Sa interview sang Bombo Radyo Bacolod kay United Sugar Producers Federation (UNIFED) Manuel Lamata, nakigsapol kahapon si Senator Imee upod sa ila, upod sa pila ka mga sugar planters.
Isa sa ginhingyo sang mga ini nga mafollow-up ang request sa pagtukod sang dam sa mga suba agud magserbe nga hydroelectric power source, kasubong man ang paghimo sang dugang nga irrigation system.
Paathag sini nga dako man ang water requirements sang katubuhan.
Nakita sang mga ini nga madamo sang fresh water sources gikan sa bukid, nga naga-agwasa lamang padulong sa dagat, nga kuntani magamit pa nga source sang kuryente.
Pinaagi sini, mas mapaayo ang produksyon sang kalamay sa Negros Occidental, nga ginakilala bilang Sugar Bowl of the Philippines.
Sa pihak nga bahin, indi man ini pabor sa importasyon samtang harvest season pa sang tubo.
Apang sa karun, aminado si Lamata nga manubo ang produksyon bangod nagkalapierde ang mga katubuhan tuga sang kakulang sang tubig nga epekto sang El Niño phenomenon nakaligad nga tuig.
Sa pihak sang manubo nga produksyon, nagapati si Lamata nga indi gid man mamierdihan ang mga sugar planters bangod nagsaka na sa P3,000 ang millgate price sa kada sako sang kalamay.
Ini ang makabawi naman sa manubo nga purisa.
Pasalig ni Lamata nga apisar nagsaka ang millgate price, nagapabilin gihapon ang retail prices.
Indi man mabudlay ang pagshift sa mechanized farming, apang pahanumdom ni Lamata nga P30 million ang balor sang kada units sang harvester, nga tuman ka bug-at para sa mga magagmay nga sugar planters.
Suno diri, ang milling season ang magatakop sa bulan sang Abril ukon sa Mayo.
