BACOLOD CITY – May natumod na nga mga suspetsado ang kapulisan sa pag luthang-patay sa driver sang Bata-Libertad nga jeep sa Purok Camansi, Barangay Banago tinalikdan nga adlaw sang Domingo.
Ini ang gin pahayag sang hepe sang Police Station 3 Senior Inspector Larry Teovisio angot sa kamatayon ni Ephraim Payas nga tumandok sang ciudad sang Silay.
Daan na nga problema kag makapila ka beses nga pag-away sang biktima kag suspetsado ang ginatudlo nga motibo sa krimen.
Suno kay Senior Inspector Teovisio, natumod na nila ang mga suspetsado apang indi pa mapalayag ang ngalan sang mga ini ilabi na nga naga padayon ang imbestigasyon.
Madumduman nga naga pa-welding si Payas sa isa ka vulcanizing shop sang gin dulugan sang depasahero nga jeep nga naga duag yellow sakay ang driver kag isa pa ka lalaki.
Sang nakit-an ni Payas ang jeep nag pudyot ini sang bato kag gin haboy ini, apang nagpanaog ang driver kag isa pa ka lalaki nga nag lampos diri sang tubo antes ini gin luthang.
