BACOLOD CITY — Yara na sa karun sa heightened alert status ang hanay sang militar sa bilog nga isla sang Negros kasunod sang pagbawi ni Presidente Rodrigo Duterte sa unilateral ceasefire sang gobyerno sa Communist Party of the Philippines-New People’s Army (CPP-NPA).
Nahibaluan nga kagab-i, gin-lift na ni Duterte ang ceasefire matapos una nga gindeklarar sang CPP-NPA nga bawion nila ang untat-inaway epektibo Pebrero 10.
Suno kay Brigadier General Francisco Delfin, Commander sang 303rd Infantry Brigade sang Philippine Army, nagbalik na sa combat operations ang mga suldado apisar wala pa sang implementing guidelines sa lifting sang ceasefire.
Padayon suno sa iya ang bayanihan activities sang militar apang wala man sang dapat nga kahangaw-an ang mga pumuluyo bangud indi man away ang katuyuan sang mga ini.
Nagapabor ang Brigade Commander sa pagpatigayon sang gobyerno kag grupo sang rebelde sang peacetalks gani aminado si Delfin nga nanugon siya sa paglift sang ceasefire bangud paagi ini kuntani agud maangkon ang lubos nga kalinungan.
