Patay ang asawa matapos nga ginbuno sang iya mismo bana nga nagtuyo man nga maghikog paagi sa pagriri sang iya nga tiyan sa Hacienda Basa, Barangay 13 ciudad sang Victorias kahapon sang aga.
Ginkilala ang biktima kay Noemi Biote, 40-anyos kag naga-obra sa isa ka bar samtang ang suspetsado naman amo si Henry Biote, 53-anyos kag nagatrabaho sa kampo.
Nahibaluan nga may tatlo ka mga kabataan ang mga ini.
Sa interview sang Bombo Radyo Bacolod kay P/Lt. Col. Eduardo Corpuz, hepe sang Victorias City Police Station, pagpangimon ang nangin motibo sa insidente bangud ginapahayag nga may karelasyon si Noemi.
Nahibaluan nga antes ang insidente, gina-alegar naga-away ang mag-asawa bangud luyag kuntani nga magbulag sang asawa rason nga nagkuha sang patalom ang bana kag ginbuno ini sang makapila ka beses.
Matapos mahimo ang krimen, nagtuyo man nga maghikog ang suspetsado.
Suno kay Corpuz, gilayon sila nga nagresponder sa lugar matapos makabaton sang impormasyon.
Naabtan sang kapulisan nga nagapaligo na sa dugo ang mag-asawa kag ginhingagaw ang mga ini nga gindala sa balay-bululngan sa nasambit nga ciudad apang gindeklarar nga dead on arrival ang asawa samtang gin-transfer naman sa Corazon Locsin Montelibano Memorial Regional Hospital ang bana.
Suno sa hepe, magapangatubang sang kaso nga parricide ang suspetsado.
Samtang, suno naman sa bilas sang biktima nga kaupod man sini sa trabaho sa bar nga si Ranelyn Biote, madugay na nga nagahambal si Noemi sa iya nga wala na ini sang gana sa iya nga bana.
