Priso na ang bana sa banwa sang Murcia nga nagpatay sa iya mismo nga asawa sa atubangan mismo sang iya mga kabataan sa ila puluy-an sa Sitio Kinabong 3, Barangay Minoyan, Banwa sang Murcia sang Sabado, Pebrero 15.
Sa interview sang Bombo Radyo kay Police Major Robert Dejucos, hepe sang Murcia Municipal Police Station, nagsugod ang paglain sang buot sang suspetsado nga si Rengie Hebong, 33 anyos, sang nagpamista sa Don Salvador Benedicto sang Pebrero 7 ang biktima nga si Alona Hibong, 31 anyos.
Apat ka adlaw nga didto nagtinir si Alona kag wala ini nagpahibalo kay Rengie.
Pebrero 11 sang nagpauli si Alona apang bangud indi luyag ni Rengie sang gamo, apisar nga nagalain ang buot, wala niya ini ginmuno.
Sang Pebrero 15 suno kay Dejucos, nag-inaway ang duha apang suno sa hepe, antes ang ila komprontasyon, ginhambalan sang magulang ni Alona ang suspetsado nga may yara ini sang kerido.
Gin-ako naman ni Alona nga may yara ini sang lalaki kag indi si Rengie ang amay sang siyam ka bulan sini nga bata.
Imbis nga magpaubos, ginhambalan pa sini si Rengie nga patyon niya ini gani wala na nakapugong ang suspetsado kag ginlabo ang asawa gamit ang espading sang makapila ka beses samtang yara sa kilid ang lima sini ka mga kabataan.
Buka ang ulo kag agtang, wawa ang kamot, utod ang tul-an sa tiil kag nakaagum sang madamo pa nga madalum nga pilas si Alona tunga sang pagpanglabo.
Malagyo pa kuntani ang suspetsado apang sang nakareyalisar ini, gilayon man siya nga nagsungka sa DSB Police Station nga ginturn-over naman sa Murcia Police Station.
Suno kay Dejucos, nakahunong sa Murcia PNP si Rengie kag nakatalana nga pasakaan sang kaso nga parricide samtang yara naman sa kustodiya sang Department of Social Welfare and Development (DSWD) ang mga kabataan sini.
