Sa pihak sang sinako-ay kahapon bangud sa gin-patigayon nga Bombo Medico 2019, may yara sang isa ka miyembro sang Philippine Coast Guard -Negros Occidental nga nakuha gid ang atensyon sang mga personnel sang Bombo Radyo Bacolod bangud sa iya ginhimo.
Timprano pa lang kahapon sang aga, madamo na ang nag-padulong sa Negros Occidental Multi-Purpose Activity Center (NOMPAC) agud maka-una sa linya sa registration, maka-pakonsulta kag maka-avail sang sungkod para sa mga katigulangan.
May yara sang isa ka 90-anyos nga Lola ang nagdali-dali padulong sa NOMPAC bitbit ang daan, gubaon kag hinulaman sini nga sungkod agud kuntani nga makakuha sang bag-o.
Sa pag-abot sa lugar, una nga gin-palapitan ni Lola Juliana Pragador ang isa ka miyembro sang PCG- Negros Occidental nga si Apprentice Seaman Christian John Deleonio agud mangkoton kun may yara pa sang sungkod.
Gilayon naman nga nag-palapit si Deleonio sa mga personnel sang Bombo Radyo nga yara sa stage sang NOMPAC agud pamangkoton kun may sungkod pa nga nabilin apang madamo na ang naka-una kuha bangud sa mas timprano pa gid nga padkadto sa venue sang aktibidad, wala na nakaabot pa si Lola Juliana.
Ginkasubo naman sang tigulang bangud madugay na sini ginahandum nga makaangkon sang iya kaugalingon nga sungkod, bangud sini, tuman man ang kasubo kag kaluoy nga ginbatyag ni Deleonio rason nga siya mismo ang nag-pangita paagi agud mahatagan sang sungkod si Lola Juliana.
Iya gin-pamangkot ang mga Bombo Radyo personnel kun sa diin makabakal sang sungkod kag gilayon ini nga nag-padulong sa mall nga malapit sa NOMPAC.
Sa iya pagbalik, bitbit na ni Apprentice Seaman Deleonio ang bag-o kag ang nagakinang-kinang nga sungkod nga iya personal nga ginbakal para kay Lola Juliana.
Wala naman ginlauman sang Bombo Radyo ang ginhimo ni Deleonio, apang naga-pasalamat gid ang talatapan kag tuman kadalayawon ang ginhimo sini agud mapalipay lang ang isa ka 90 anyos nga tigulang.
Emosyonal naman si Lola Juliana samtang ini ang naga-pasalamat kay Deleonio.
