Padayon nga nagapanawagan ang kapulisan sang Murcia Municipal Police Station sa mga pumuluyo nga mabuligan man sila sa pagpangita kag pagtumod sang ginikanan sang bag-ong bun-ag nga lapsag nga lalaki nga ginbilin sa bypass road, Hda Bernabe, barangay Salvacion, sa banwa sang Murcia.
Sa interview sang Bombo Radyo Bacolod kay Police Captain Honey Labaro, hepe sang Murcia Municipal Police Station, padayon pa ang ila nga imbestigasyon agud nga matumod kun sin-o ang nagbilin sang lapsag sa nasambit nga lugar.
Madumduman nga ang lapsag nasapwan sang tatlo ka lalaki nga nagapangita sang damang.
Ini nasapwan nga nagahapa kag naputos sang bayo.
Gilayon naman nga nagtawag sang police ang mga nakakita sa lapsag kag ang personnel sang Municipal Health Office pa ang nag-utod sang umbilical cord.
Sa karun nagapanawagan ini sang bulig gikan sa mga pumuluyo agud nga matumod ang ginikanan sang lapsag nga lalaki.
