Padayun sagihapon ang pagbantay sang Bacolod City Disaster Risk Reduction and Management Office (CDRRMO).
Sa interview sang Bombo Radyo Bacolod kay Earl Edward Ramirez, chief operation officer sang Bacolod CDRRMO, indi tanto ang pag-ulan sa Bacolod City kaina sang aga, apang santo sa forecast mabaskog kag tayuyon ang mangin pag-ulan subong nga hapon tubtob sa gab-i.
Suno diri, humalin pa kagab-i ang ila pagpatigayon sang monitoring kag sila ang wala pa sang may nabatun nga report sang nabahaan ukon pagsaka sang water levels sa mga suba.
Apang pasalig ni Ramirez nga padayun ang ila monitoring sa mga flood prone areas.
Paathag sini nga ang mga pag-ulan ang resulta sang Southwest Monsoon ukon Hangin Habagat nga ginpabaskog pa sang Severe Tropical Storm ‘BEBINCA’.
Nagalaom ini nga maghagan-hagan na ang tiyempo bwas sa hapon tubtob sa Domingo.
Ang maulanon nga panahon subong nga adlaw man ang rasun sa pagdeklarar nga wala sang face to face classes sa elementary tubtob high school, pampubliko man ukon pribado nga buluthuan.
Ginhatag naman sa mga college ukon universities ang disgretion kun ila nga isuspend ang klase sa kolehiyo.
Pahanumdom na lamang ni Ramirez ang pag-aligmat partikular na sa mga flood prone areas, kag kun kinahanglan sang rescue, mahimo lamang makacontact sa Bacolod CDRRMO hotlines nga 432-3871, 432-3872, kag 432 3873 kasubong man sa Cellphone No. 09302434706.
Pasalig sini nga 24 oras nga onstandby ang emergency response team kag preparado sa pagbulig sa mga pumuluyo.
