Nagapadayon pa ang imbestigasyon sang Bacolod Police Station 4 angot sa pag-ambush sa isa ka pulis ang assigned sa Negros Occidental Police Provincial Office sa Purok Camelot, Brgy. Estefania, ciudad sang Bacolod kahapon sang aga.
Sa interview sang Bombo Radyo Bacolod kay Police Major Charles Gever, station commander sang Bacolod Police Station 4, ginpahayag sini nga nagasakay sa iya salakyan si Police Staff Sergeant Miguel Perez III sang ginpaarakan sang luthang sa kurbadahon nga dalan antes ang Camelot Village.
Suno kay Gever, may yara sang gina-alegar wala matumod nga suspetsado nga nagpanago sa kahilamunan kag ginluthang ang biktima kun sa diin tadtad sang bala ang windshield kag driver’s seat sang blue nga Toyota Wigo.
Suno kay Gever, ang biktima ang naigo sa nawala nga bahin sang abaga sini kag nagapabilin sa karon sa ospital.
Suno sa hepe, ginbantayan sang mga suspetsado si Perez sa mataas nga bahin sang lugar.
Nahibaluan nga matapos ang ambush, nakagwa pa ang biktima sa iya salakyan kag nakasakay sa tricycle gani nakapangayo ini sang bulig sa mga residente nga amo ang nagdala sa iya sa ospital.
Ginpahayag man ni Gever nga ang nakita sa lugar amo ang empty shells sang long firearm.
Si Perez ang assigned sa karon sa Provincial Legal Office sang Negros Occidental Police Provincial Office.
Ginalantaw sang pulis nga may kaangtanan sa trabaho kag personal nga hiligut-anon ang kabangdanan sa pag-ambush sa biktima.
Ang biktima ang nakabaton sadto sang Medalya ng Kagalingan matapos ang madinalag-on nga buybust operation batok kay Mikko Tiu Tan kun sa diin narecover ang 20 ka mga plastic bag nga naga-unod shabu nga may kabug-aton nga 100 kilos kag nagabalor sang P100 million sa Brgy. Sta. Monica, Quezon City.
