BACOLOD CITY — Isa ka motorcade ang ginpatigayon sang mga radio personalities kag employees sa ciudad sang Bacolod kaina sang aga may kaangtanan sa World Radio Day.
Ini matapos nga wala nadayon sang Pebrero 13 ang nakatalana nga motorcade bangud sa paglaslas sang bagyo Basyang.
Halin sa dalan San Juan, naglabay sa pila ka mga dalan sa ciudad sang motorcade antes ini nakalab-ot sa SM City Bacolod kun sa diin may yara sang exhibit sang memorabilia sa radyo kaangay sang tuman na kadaan nga drum sang Bombo Radyo.
Indi magnubo sa 40 ka mga salakyan ang nag-upod sa motorcade kag nalakip ang mga empleyado kag patrol sang Bombo Radyo Bacolod sa mga nakigbahin.
Ang exhibit sa amo nga mall ang nagsugod subong nga Pebrero 19 kag magatakop sa Pebrero 23.
Pagkagab-i, hiwaton ang Tingog kag Handurawan Award para sa mga personalidad sa radyo.
Nahibaluan nga ang Bacolod City ang pinakauna nga ciudad sa pungsod nga nagpasar sang ordinansa nga iselebrar ang World Radio Day tagsa Pebrero 13.
