Wala pa sang identity ang motorcycle rider nga napatay matapos nabungguan sang pick-up sa Barangay 32, Bacolod City.
Sa interview sang Bombo Radyo kay Police Lieutenant Ramie Sayson, deputy station commander sang Bacolod Police Station 1, ang insidente nagluntad alas-4:00 kahapon sang kaagahon, kun sa diin imbolbado ang isa ka Yamaha N-MAX nga motorsiklo nga may plate number 129-NPJ kag Isuzu D-MAX nga ginamaneho ni Moises Estorco, 62 anyos, residente sang Purok Santol, Brgy. 20, Bacolod City.
Suno kay Sayson, wala sang papeles nga nakuha sa motorsiklo kag identification cards sa biktima gani tubtob sa karun wala pa ini sang identity.
Ang duha ang nagbungguanay sa intersection sang Lacson-San Sebastian Streets, Brgy. 32, kun sa diin ang motorsiklo ang halin sa west padulong sa east samtang ang pick-up naman ang halin sa south padulong sa north.
