Nagpatigayon sang aktibidad ang Muslim Community sa Bacolod City Government Center Ground may kaangtanan sa selebrasyon sang pagtakop sang Ramadan ukon Eid Al-Fitr.
Sa interview sang Bombo Radyo Bacolod kay Johannah Sultan, focal person sang Bacolod Muslim Community, ang ila nga Presidente ang yara sa Israel para sa pagsaulog sang Eid, apang ini ang kada tuig man nga nagapanghatag sang bugas.
Suno diri, apisar nga wala sang moonsighting sang Marso 20, sila ang nagpatigayon sang aktibidad sa Negros Occidental Provincial Capitol Lagoon.
Subong nga adlaw, ang mga Masjid ang may mga aktibidad man nga natalana kaangay sa pahampang sa mga kabataan.
Sa Eid, sila ang nagatililipon man ukon nagabisita sa balay sang ila mga kaupdanan, kag nagapakaon.
Ini bilang pagselebrar bangod madinalag-on nila nga natapos ang pagpu-asa ukon fasting sa Ramadan.
Suno diri, subong nga Eid Al-Fitr, natapos naman ang ila nga isa ka bulan nga pu-asa.
Apang ang mga babayi nga Muslim nga may-ara sang period ang wala anay ginapa-upod sa pagpu-asa sa una nga inadlaw sang Ramadan.
Gani karun nga nagtakop na ang Ramadan, kinahanglan nila nga ipadayun ang pagpu-asa depende kun pila ka adlaw ang ila nga nalaktawan.
Ginapangamuyo nila ang pag-untat na sang mga kinagamo sa Middle East.
Nagalaom si Sultan nga makita na ang paghiliusa sang tanan sa masunod nga Ramadan.
