Ginapaimbestigaran pa sa karun sang alkalde sa ciudad sang Sagay, kun sa diin nagkadto ang P7.3 million nga nabilin nga pondo nagikan sa P22 million nga Health Emergency Allowance (HEA) para sa mga health professionals sa ciudad.
Sa interview kay Sagay City Mayor Narciso Javelosa Jr., nga nagpangutang pa ini agud nga mahatagan ang 93 ka mga healthcare workers nga nagatrabaho sa Alfredo Marañon Sr. District Hospital.
Magluwas sa personal nga kwarta sang alkalde, siya ang nagpangutang pa sa iya nga pamilya agod makatipon sang P7.3 million nga inug-release pa sa mga healthcare workers.
Ini matapos nga wala makabaton sang ila nga Health Emergency Allowance (HEA) ang mga healthcare workers bangod sa gina-alegar nalipatan ni City Treasurer Juvy Pinongan ang combination sang vault kun sa diin nabutang ang P7.3 million nga nabilin nga pondo para diri.
Suno kay Javelosa, nagkadto sa Sagay City Hall ang mga doctors kag nurses nga nagserbe nga frontliners sadtong COVID-19 pandemic.
Suno sa alkalde sang Agosto pa gindownload sang national government ang nasambit nga pondo.
Ginpatawag man sini ang City Treasurer agud nga hibaluon kun ngaa wala mahatag ang HEA sang mga nasambit nga health professionals.
Apang nagrason ang natungdan nga ara sa vault ang kwarta nga P7.3 million apang nalipat ini sang number combination agud nga mabuksan ang vault.
Apang sa bahin sang alkalde nagapati ini nga wala na sa vault ang kwarta kag plano sini pabuksan ang vault apang maga-konsulta pa sa iya nga abogado.
Sa karun, ginatugyan na lang sang alkalde sa city legal office ang imbestigasyon batok kay Pinongan.
