Padayun ang panawagan ang mga staff gikan sa mga ospital sa idalom sang Provincial government sang Negros Occidental, matapos nga wala gihapon mabatun ang nagakadapat nga Health Emergency Allowance (HEA).
Sa interview sang Bombo Radyo Bacolod kay Progressive Alliance of Capitol Employees (PACE) President Randy Peacita, ang mga ospital nga ginapadalagan sang mga banwa ukon ciudad ang nakabatun na sang ila nga Health Emergency Allowance sa pagserbisyo sa tion sang COVID-19 Pandemic.
Apang ang mga District hospital nga yara sa idalom sang provincial government ang wala pagid makabatun partikular na sang HEA sa mga nagserbi sang Agosto tubtob Disyembre 2021 kag Enero tubtob Hulyo 2023.
Ang mga ini ang nag-atubang sa mga pasyente kaangay sa mga na-assign sa COVID hospital, isolation facilities, health centers kag iban pa.
Ang siyam ka mga ospital ang ginalakipan sang Teresita Lopez Jalandoni Provincial Hospital sa Silay City, Ignacio Lacson Arroyo Sr. Memorial District Hospital sa Isabela, Valladolid District Hospital, Cadiz District Hospital, Governor Valeriano M. Gatuslao Memorial Hospital sa Himamaylan City, Eleoterio T. Decena Memorial Hospital sa Hinobaan, Lorenzo D. Zayco District Hospital sa Kabankalan City, Don Salvador Benedicto Memorial Hospital sa La Carlota City, kag Merceditas S. Montilla District Hospital sa Sipalay City.
Suno kay Peacita, nagapamangkot na ang mga health workers sa rasun kun ngaa tubtob sa karun wala gihapon ang ila Health Emergency Allowance apisar sa nauna na nga pahayag ni President Ferdinand “Bongbong” Marcos nga ini ang bayaran.
Dugang pa sini nga sa Teresita Lopez Jalandoni Provincial Hospital lamang, nagadangat na sa 6,000 ang health workers nga kinahanglan bayaran.
Ang tagsa ka health workers ang makabatun depende sa level sang risk sa ila trabaho kun sa diin ang high risk ang makabatun sang P9,000 kag may iban nga magabatun sang P6,000.
Sa kabug-usan, ginalantaw nga nagadangat pa sa P200 million ang kinahanglan nga pondo.
Nahibaluan nga tubtob sa karun wala pa nadownload sa Department of Health Region 6 ang pondo, nga amo kuntani ang magapanaog sa provincial government.
