BACOLOD CITY – Patay ang isa ka “AWOL” nga pulis samtang pilason man ang isa pa ka pulis kag bata sini sa shooting incident sa Rosario-Yulo St. Barangay 14, ciudad sang Bacolod kagab-i.
Nahisayran kay SPO4 Celito Dullan, chief investigator sang Police Station 1 nga dead on arrival sa Corazon Locsin Montelibano Memorial Regional Hospital si PO1 Federico Nicholas, “AWOL” kag ulihi nga na-assign sa Bacolod City Police Office (BCPO).
Gindala naman sa Bacolod Adventist Medical Center (BAMC) si PO1 Wilmer Bansag nga assigned sa gate sang Negros Occidental Police Office (NOCPPO) kag ang 17-anyos sini nga bata nga si April Kim.
Madamo nga pilas sa lawas ang naangkon ni Nicholas kag sa pag-usisa sa guard on duty sa regional hospital, narekober sa bulsa sini ang cash nga kapin 5 mil pesos kag duha ka dalagko nga putos sang gina-suspetsuhan shabu.
Yara naman sa ICU sang BAMC si PO1 Bansag matapos naglubong ang bala sa bag-ang sini samtang ang iya bata ang nakaangkun sang pilas sa tiil.
Santo sa pag pangusisa ni SPO4 Dullan, nahisayran nga sakay ang mga biktima sang duag silver nga Mitsubishi Adventure nga gina-maneho ni Nicolas kag naglagaw-lagaw lang malapit sa ETCS-1 sang sila ang nakasugata sang isa ka salakyan kag nagpaarak sang luthang.
Sa dugang nga impormasyon nga nakuha sang imbestigador, puti nga Vios ang ginsakyan sang mga suspetsado sa krimen kag posible nga ginbantayan gid ang mga biktima.
Pito tubtob 8 ka naka-bonnet ang ginapahayag nga suspetsado.
Samtang narekober naman sa crime scene sang masobra 30 ka bala sang nagkalain-lain nga armas nga ginalakipan sang 9 mm, 5.57 armalite kag cal. 45.
Suno sa pila ka mga testigo ila nabatian nga kaangay sang fireworks ang pag-arak sang linupok.
