BACOLOD CITY — Tuman kahina ang turnout sang mga botante nga nagaparehistro sa mga satellite registration services sang Commission on Elections sa probinsya sang Negros Occidental.
Ginpahayag ni Provincial Election Supervisor Atty. Jessie Suarez nga humalin sang nag-resume ang registration sang mga botante sang bulan sang Disyembre, indi pa tuman kadamo ang nagparehistro pinaagi sa pag-avail sang satellite registration services.
Humalin sang nagsugod ang pagbalik sang rehistrasyon, may yara sang 5,624 ka mga Sangguniang Kabataan voters nga nagparehistro; 6, 305 ang regular voters; 42 ang persons with disability samtang 197 naman ang mga senior citizens.
Samtang, may yara naman sang 3, 041 ka mga voter’s ID nga narelease ang Comelec sa bilog nga probinsya.
Sa Marso 8 nga amo ang Women’s Day, isa ka special registration para sa mga kababayihan ang patigayunon sang Comelec kun sa diin hatagan sang prayoridad ang mga babayi.
Ginalauman naman ni Suarez nga magadamo ang magaparehistro kun malapit nalang ang deadline sa Abril 29.
