Pasakaan sang kaso nga theft subong nga adlaw ang lalaki nga nagapangawat sang metal grills sa atubangan sang Negros Occidental High School (NOHS).
Ang lalaki ang ginkilala nga si alyas “Tinoy”, 36-anyos, kag residente sang Barangay 16, ciudad sang Bacolod.
Sa interview sang Bombo Radyo Bacolod kay Police Major Eugene Tolentino, Station Commander sang Police Station 1, nagagamit ang suspek sang kahoy kag ginabangilan ang kabilya agud amat-amat nga matangtang paagi sa pagliso-liso sini.
Madugay na nga ginaamat-amat sang suspek ang kabilya tubtob nga nakalbo na ang metal bars.
Pahayag ni Tolentino, mahal ang baligyaanay sini bangud ini ang solido nga sansalon.
Suno diri, may yara na sang mga nakaligad nga record ang suspek apang wala napasakaan sang kaso.
Suno kay Tolentino, ang City Legal Office ang maga-file sang kaso nga theft batok sa suspek bangud ginapanag-iyahan sang ciudad ang metal grills.
