Nagdangat sa 22 ka pamilya ukon 44 ka indibidwal ang naapektuhan sang sunog nga nagluntad sa Purok Calachuchi Burgos-Locsin St., Brgy. 9, Bacolod City, Negros Occidental kahapon sang hapon, December 10, 2025.
Sa interview sang Bombo Radyo Bacolod kay Fire Superitendent Jenny Mae Masip, Fire Marshal sang Bacolod City Fire Station, alas 3:40 ang takna sang haponmay nabaton sila nga tawag nga may yara sang nagakasunog nga balay sa nasambit nga Barangay.
Suno kay Masip nagdangat sa pito ka balay ang nasunog kun sa diin lima ang totally damaged kag duha ang partially damaged.
Nagdangat naman sa P155,000 ang estimated nga balor sang kahalitan nga ginbilin sang sunog.
Wala man sang recorded nga nasamaran sa nagluntad nga sunog.
Aminado si Masip nga may kabudlayan ang pagresponde bangud wala sang access road pasulod sa nasunugan bangud gamay lang ang footwalk pasulod.
Suno diri ang iban nga fire trucks ang didto nagplastar sa dalan Lacson sa bahin sang parking area sang Gegato-Abecia Funeral Homes sang nagresponde sa sunog.
Ang ginhalinan sang sunog ang sa ikaduha nga panalgan sang balay ni Roberto Maligdong.
Antes pa man ang sunog ginpahayag sang nagapuyo sa balay nga may napanimahuan sila nga daw may nagdabok halin sa ikaduha nga panalgan sang balay.
Padayon ang imbestigasyon sa karun sang Bacolod City Fire Station sa gintunaan sang sunog.
Panugyan ni Masip ilabi na subong nga Disyembre nga may mga ginapangtakod nga Christmas lights nga siguruhon nga makakas ang mga nakasaksak antes nga maghalin sa balay kag ipacheck ang mga linya sang kuryente agud nga malikawan ang pagluntad sang sunog.
