Ginpahayag sang isa sa mga upod sang nalumos sa baybayon sang Barangay Singcang-Airport, Bacolod City kahapon sang hapon, nga kahapon lang sila liwat nakabalik sa lugar makaligad sang pila ka bulan.
Sa interview sang Bombo Radyo Bacolod kay Randy Topez, kahapon lamang nagpanghagad si Willie Chris Larios nga maligo sa nasambit nga baybayon bangud nabatyagan sini nga kamala sang iya nga lawas.
Wala man ini makahibalo kun may nabatyag ang biktima apang nakapahayag na ang iloy ni Willie nga nagapanglapsi na ini.
Dugang pa sini nga ang biktima ang nagpahayag nga basi kun makapaligo ini maumpawan ang kamala nga nabatyagan sini sa iya lawas.
Pag abot sa lugar nakita nila nga madalom ang tubig apang makapila naman ka beses nga nagpaligo ang biktima nga madalom ang tubig, kag wala man sang may nagakatabo sa iya.
Antes pa man magpaligo ang biktima ginhambalan nila ini nga kun mabiringan indi siya mabuligan bangud wala sang makahibalo nga maglangoy sa ila.
Suno kay Topez, antes pa malumos ang biktima nakita sang mga ini nga nagpalumos lumos pa ini gani wala sila maglaom nga matuod na ini bangud makabalo man ini nga maglangoy apang wala nagdugay nagsinggit na ini nga magapangayo sang bulig.
Bangud sini nagpangayo man ini gilayon sang tabang bangud wala sang bisan isa sa ila nga makahibalo maglangoy apang pagbalik sang mga ini wala na nila makita ang biktima.
Ginalantaw man sini nga ginbiring ang biktima gani nalunod ini.
