Dako ang ginnubo sang narecord nga sunog sa Bacolod City sang Marso subong nga tuig kun ipaanggid sang kaangay nga bulan sang 2024.
Sa interview sang Bombo Radyo Bacolod kay Fire Officer 2 Rollin Paulan, fire chief investigator sang Bacolod City Fire Station, sa ila nga record, 14 lamang ang fire incidents subong nga Marso 2025.
Ini ang tuman ka nubo kun ipaanggid sa 33 fire incidents nga narecod sang Marso 2024.
Ang pagnubo sang narecord nga sunog ang nagapakita naman nga epektibo ang ila mga ginpatigayon nga public dissemination sang mga dapat dumdumon agud malikawan ang sunog.
Apisar nga natapos na ang Fire Prevention Month ukon bulan sang Marso, pasalig ni Paulan nga pasanyugon pa nila ang information campaign agud mapanubo nagid ang kaso sang fire incidents.
Sila ang nagakoordinar man sa mga Barangay kag nagalaom ini nga madami pa sang mga Barangay nga magpartisipar sa ila nga mga programa.
Nagapati ini nga sa pagpalapnag sang pahanumdom sa masami nagatuga sang sunog kag paagi agud ini ang malikawan ukon fire prevention kag fire safety tips, mapanubo man ang insidente sang sunog ilabi na nga padulong na sa summer season.
Electrical in nature naman ang pinakadominante nga rasun sang sunog.
Sa summer, may tion nga 24/7 ang pag-operar sang mga electric fan kag aircons, apang pahanumdom ni Paulan nga hatagan gid sang pahuway ang mga appliances.
Dapat man nga ipalantaw sa mga lisensyado nga electrician ang linya sang kuryente kag matumod kun ano lamang kadako nga load ang masarang sang electrical wirings.
Ini bangod ang overloading ang masami man nagatuga sang sunog.
