Dakop ang isa ka lalaki matapos ginhold-up ang isa 8-Twelve Convenience Store sa Valdevia St., Barangay 4, ciudad sang San Carlos sang Setyembre 3 sang kaagahon.
Ginkilala ang suspetsado kay Windel Bantiles, 23-anyos, lalaki, kag residente sang Sitio Lomboy, Barangay Malangsa, Vallehermoso, Negros Oriental.
Sa interview sang Bombo Radyo Bacolod kay Police Major Ryan Villasario, Deputy Chief of Police sang San Carlos City Police Station, nakabaton sila sang impormasyon nga ginhold-up ang nasambit nga convenience store.
Gilayon man ang mga kapulisan nga nagresponde sa lugar sang insidente.
Suno kay Villasario, gilayon nila nga naaresto ang suspetsado nga nagapanago lamang sa boarding house sini.
Wala man sang criminal record si Bantiles sa San Carlos City Police Station kag ginapahayag nga wala man ini sang kaangtanan sa nagligad lamang nga pagpangawat sa isa ka mall sa nasambit nga ciudad.
Suno diri, ang suspek ang nagsulod sa convenience store kag nagdeklarar sang hold-up kun sa diin gintayaan ang mga yara sa sulod sang store.
Nakuha sa paghinakop sang suspetsado ang ginkawat nga kwarta nga nagabalor sang P4,300.00 kag isa ka caliber .45.
Nakahunong na ini sa San Carlos City Police Station kag pasakaan ang suspetsado sang kaso nga robbery, kag paglapas sa RA 10591 ukon Comprehensive Firearms and Ammunition Regulation Act.
Nagpanugyan man si Villasario sa mga pumuluyo nga kun may yara sang nakita nga makaduluda sa palibot, indi magpangduha-duha nga magreport sa mga kapulisan.
