Nagdangat na sa masobra 1,160 ang kabug-usan nga numero sang mga nagkalamatay sa lapnagon nga pagbaha kag landslide sa pila ka bahin sang Asia lakip na ang Sri Lanka kag Indonesia.
Ang pag-ulan ang tuga sang nagkalain-lain nga weather systems nga nag-igo sa pungsod sang Sri Lanka, Sumatra, Indonesia, sur nga bahin sang Thailand kag northern Malaysia kadungan sang monsoon season.
Sa Indonesia, ginabanta 593 na ang nagkalamatay kag 470 ang missing.
Nagpadala naman ang gobyerno sang tatlo ka warships kag duha ka hospital ships apang madamo sa gihapon nga mga dalanon sa apektado nga mga lugar ang indi maagyan.
Samtang, narekord naman sa Sri Lanka ang 390 nga nagkalamatay kag 352 nga missing.
Kadungan sini, nagdeklarar si Sri Lankan President Anura Kumara Dissanayake sang state of emergency.
Samtang sa Thailand, 176 naman ang narekord nga nagkalamatay kag duha sa Malaysia.
